අංක 222, කඳවල, ජයමාවත කටාන ලිපිනයේ පදිංචි හපුආරච්චිගේ පීටර් කැනීසියුස්‌ අප්පුහාමි මහතාට සහ වර්ණකුලසූරිය, ක්‌ලාරා ප්‍රනාන්දු මහත්මියට දරුවෝ දෙදෙනෙක්‌ සිටිති. ඉන් වැඩිමල් දරුවා අ. පො. ස. (උ. පෙ) විභාගයෙන් අනතුරුව රැකියාවක්‌ අපේක්‌ෂාවෙන් සිටී. පවුලේ දෙවැන්නා ප්‍රාන් දනුරයි. ඔහු ඉපදී තියෙන්නේ 2000/08/21 දින උපන්දා සිට ඔහුගේ දෙපා පන නැත. කන් ඇසෙන්නේද නැත. කතා කිරීමටද නොහැකිය. හිස ඔසවා සිටීමට ද නොහැකිය. අඩුම ගානේ රෝද පුටුවකවත් වාඩිවී සිටීමට නොහැකිය. ඔහු ජීවත් වන්නේ බේත් බලයෙනි. මේ සඳහා මාසයකට රු. 4000 - 5000 ත් අතර මුදලක්‌ වැය වන බව පියා අප සමග පැවැසීය. කුලී වැඩ කරමින් පවුල ජීවත් කරවන ඔහුට මේ තත්ත්වයට මුහුණදීමට ඉතා අපහසු වී තිබේ. දරුවාත් සමඟ ඔට්‌ටු වී අද ඔහුගේ බිරිඳ පසුවන්නේ ඇදුම රෝගයේ ගොදුරක්‌ බවට පත්වය.
උපන්දා සිටම ස්‌නායු ආබාධයකින් පෙළෙන මේ දරුවා ඉපදී තෙමසකින් සුවපත් වන බව ප්‍රතිකාර කරන වෛද්‍යවරුන් කීවත් දැන් ඔහුගේ වයස අවුරුදු 9 කි. කොළඹ ජාතික රෝහල, රාගම පුනරුත්ථාපන රෝහලේ නේවාසිකව ප්‍රතිකාර ගත් ප්‍රාන්ගේ තත්ත්වයේ කිසිදු වෙනසක්‌ සිදුවී නොමැත.
අනුන්ගේ නිවසක දිවි ගෙවන මේ පවුලට අද දයාවේ හස්‌තයක පහස අවශ්‍ය වී තිබේ. බිම දිගාවී සිටින මේ දරුවාගේ දෙමාපියන්ට බේත් ටිකක්‌ ගන්න මුදලක්‌ හා ඉන්න හිටින්න අතු පැලක්‌ හරි අටවා දෙන්න ඔබටත් හැකිනම් ඒ මේ ජීවිතයේ කර ගන්නා උතුම්ම පිංකමක්‌ වනවා නොඅනුමානයි. පීටර් කැනීසියස්‌ මහතා නමින් මීගමුව මහජන බැංකුවේ ගිණුම් අංකයට ඔබටත් දායක විය හැකිය. 034 - 2 - 001 - 4 - 0011688 .
No comments:
Post a Comment